متابعات – نبض الوطن – بالامس ادرنا حواراََ عن شعراء بلادي ممن قدموا روائع الكلم الصادق والحرف الجميل كانوا قمم في غزلهم وفي ما يكتبون قدموا اعمالاََ رائعة اتسمت بالصدق والأمل و الغزل العفيف الممزوج بروح الصوفي المتعبد… شعراء بلادي المخضرمين كانوا أصحاب سيرة ومسيرة رفدوا مكتبة الغناء السوداني بدرر الأعمال واروعها منهم من قضى نحبه ومنهم من ينتظر.
واحد من هذه القمم الشاعر الكبير الراحل عوض جبريل الذي قدم مدرسة جديدة ومتفردة في عالم الغناء والشعر الجميل وغني له كبار الفنانيين وصغارهم فكانت كلماته واضحة المعالم مختلفة عما سواها حلقت بنا في عوالم الجمال والالق المتدفق والغزل العفيف وقدمت عناوين مختلفة في مدرسة الشعر السوداني.
ما تنسي لي ترسلي
يسعدني انك تذكريني
وعني دائماََ تسالي..
اذكري الريدة الكتبنا حروفا
بي اجمل وفاء
اذكري الريدة القبيل عجز
الخيال ما يوصفا
اطري الحنان المنى ليك
ساعة شقا وساعة صفا
اذكري الود الزمان بيناتنا
واطري المعرفة
بوصيك انا
لو افتكرتي في يوم في زاتك
وبحثتي عن الما انقضي من
عمري من فيض أمنياتك
ولقيتي في جواك اوصافي
وصفاتك
انا لسا ما سكت النغم في
صدري من فيض أمنياتك
على اي حال
ان شاء الله ما اخر وداع
عشم اللقاء بيك ما انقطع لو ما إستطاع
اصلوا الحياة بين الأمل والشوق شراع
لكني زورق حبي ليك ياغالية ما داير شراع
عوض جبريل ملي بالأمل والحب والكلمة الصادقة وابداع اهل ام درمان الفطري الذي كان يشكل دوماََ رافداََ مهماََ للمكتبة السودانية وام درمان أرض إبداع أنجبت عوض جبريل المولود في حي الدباغة عام 1932م والذي درس القرآن بمدرسة ابوروف القديمة ومن ثم دخل المعهد الفني وبعدها كان في منتدى ابوروف الثقافي.
بدا بالتقليد في اغاني الحقيبة وكان يردد اغاني عثمان حسين واتجه الي التمثيل مع عثمان تور الجر.
يمتلك عوض جبريل كلمة مدهشة في كتابة الشعر ولحنه بدا الغناء في الحفلات ثم اتجه للغناء مع زميله الفاتح حاج سعد.
أعماله ظلت وسوف تظل واحدة من أجمل الأعمال في مكتبة الغناء السوداني وقد كتب روائع الاغنيات منها اغنية ( لي حبيب محروم منو لي زمن بسأل عنو وهي أول أعماله ) غنتها الفنانة فاطمة الحاج وكتب ( كل ما سالت عليك صدوني حراسك ردوا الجواب قاسي مع اني من ناسك ).
ولاحمد الجابري كتب اسمر يا اسمر والشغل بالي انا بريدو وكتب ايضاََ شال من الحمامة وشيها وكتب انا حبيت الجمال لا تلمني التي غناها حميدة محمد سعيد وغني له رمضان حسن الصباح الزاهي.
وكتب أيضا ياماشي لي أم درمان سلم على الناس الحنان وانتقل نقلة أخرى مع الفنان كمال ترباس صاحب المدرسة المتفردة والذي غني له هلا يا هلا وضفاف القاش وكفاك ما تبكي ياعيوني وأغنية سيبني في عز الجمر انت من حولي بتمر.
محمد احمد عوض أيضا نهل من شعر عوض جبريل وغني له اغنية مع السلامة :
يسعدني انك تذكري
وعني دائماََ تسالي
اذكري الريدة الكتبنا حروفا
بي اجمل وفاء
اذكري الريدة القبيل عجز الخيال ما يوصفا
اطري الحنان المنى ليك
ساعة شقا وساعة صفا
اذكري الود الزمان
بيناتنا واطري المعرفة..
أيضا بادي محمد الطيب تغني له بأغنية ست البنات الضوت السهلة وخلف الله حمد الليلة وين ياعيني سهر الليل والنوم ابي لي.. وعوض الكريم عبد الله ام ضي وعبد الله محمد اغنية الحنين البي ليه ما قدروه العمر من وين بشتروه.
رجل يكتب بكل حب وكل امل اغنية مثل اغنية ظروف بتعدي :
ظروف بتعدي ما تهتمي للايام
طبيعة الدنيا ذي الموج تجيب وتودي
ما تهتمي اصلوا الناس حياتا ظروف
بتتعود تغير كل خط مالوف
مصير الزول حياتو ياما فيها يشوف
وفي دنيانا بنلاقي الفرح والخوف
مصير الزول عشان يفتح طريق يادوب
يكون زادو البشيلو معاه شوق مشبوب
عشان يلقى انتصارو يازمن محبوب
يضَوق المرة ويتوشح بصبر أيوب
جمال الدنيا في بسمة سرور وجمال
وفي فرح الخواطر الطيبة في الآمال
وفي شروق الصباح في بسمة الأطفال
ومهما تظلم الايام ضياها الفال
رحم الله شاعر الانشغالات كما يحلو تسميته دائماََ الذي تذكرناه في جلسة سمر وطفنا معه في ما قدم من جميل الكلمات واعذب الألحان فقد كان صاحب موهبة متفردة لن تتكرر ابداََ….
اخيراََ :
ياظلام الليل العلي ما تزيلوا
طال بعاد افراحي والالم طال ليلو
ياحليلو حنانا وريدنا بالوليلو
الخواطر تبكي و العيون تحكيلو…
نلتقي بحول الله،،،،
